Ko‘rgazmada O‘zbekiston, Belarus, Rossiya, Pokiston, Bangladesh va Gollandiyadan sport mahsulotlari ishlab chiqaruvchi va bu sohada xizmatlar ko‘rsatuvchi 20 ga yaqin dunyoga mashhur kompaniya qatnashmoqda. Uning ochilishiga turli mamlakatlar ishbilarmon doiralari va davlat tashkilotlari vakillari to‘plandi.

Ta’kidlandiki, bugungi O‘zbekiston haqli ravishda sport davlati hisoblanadi. Sportchilarimiz orasida jahon chempionlari, eng nufuzli xalqaro turnirlar, Olimpiya va Osiyo o‘yinlari g‘oliblari ko‘p. Sport bilan faol shug‘ullanishga mamlakatimizning o‘sib kelayotgan avlodi to‘liq jalb etilgan. Bolalar va yoshlar uchun “Umid nihollari”, “Barkamol avlod”, “Universiada” musobaqalari tashkil etilmoqda. Respublikada sportning ko‘plab turlari bo‘yicha o‘nlab xalqaro turnirlar o‘tkazilmoqda. Ularda qatnashish dunyoning mashhur sportchilari uchun sharaf hisoblanadi.

Ko‘rgazmaning ochilish marosimida ta’kidlandiki, bularning hammasi Prezident Islom Karimovning sog‘lom, barkamol avlodni tarbiyalashga qaratilgan izchil siyosati natijasidir. Davlatimiz rahbarining farmon va qarorlariga muvofiq mamlakatda sportni rivojlantirish va aholini unga jalb etish uchun kuchli moddiy-texnik baza yaratilgan. Har bir shahar, tumanda zamonaviy sport majmualari qurilgan, ta’lim maktablarida va boshqa o‘quv muassasalarida sport zallari mavjud, turli seksiyalar faoliyat ko‘rsatmoqda.

Ularni xalqaro standartlarga javob beradigan uskunalar va anjomlar bilan jihozlash va buning uchun tegishli sanoatni rivojlantirishga alohida e’tibor qaratilmoqda. O‘zbekistonda xorijiy ishlab chiqaruvchilar samarali faoliyat yuritishi uchun barcha sharoit yaratilgan. Shu bois, yurtimizda sport sohasida ishlayotgan xorijiy kompaniya va firmalar soni yildan-yilga ortib bormoqda. Ular bizning bozorimizga yanada kengroq kirib kelishdan manfaatdor. Toshkentda ikkinchi bor o‘tkazilayotgan “Sport olami” xalqaro ixtisoslashgan ko‘rgazmasi ham buni tasdiqlaydi.

“Sport olami-2007” ko‘rgazmasida stadionlar, yopiq majmualar va futbol maydonlari uchun qoplamalar ishlab chiqarish, sport inshootlarini to‘liq jihozlash bilan shug‘ullanuvchi kompaniyalar mahsulotlari namoyish etilmoqda. Ko‘rgazmaga tashrif buyurganlar zamonaviy sport kiyimlari, trenajyorlar va o‘quv muassasalarini jihozlash uchun mo‘ljallangan boshqa sport uskunalarining har xil turlari bilan tanishadi. Bundan tashqari, stendlarda maxsus adabiyotlar, mashg‘ulotlar va boshlovchi sportchilarni tarbiyalashning o‘ziga xos uslublari dasturlari joylashtirilgan.

O‘zA