.:Jurnalistlar Sayti:.

“Nihol-2009”: yosh iste’dodlar saralanmoqda

Dilnoz — Sun, 17 May 2009 18:42:51 GMT

Davlatimiz rahbari Islom Karimov tashabbusi bilan tashkil etilgan “Nihol” mukofoti respublika ko‘rik-tanlovi iqtidorli yoshlarni aniqlab, har tomonlama rag‘batlantirishda muhim o‘rin tutmoqda. Surxondaryo viloyatida an’anaviy tanlovga yoshlarning qiziqishi yildan-yilga ortib bormoqda.

Ayni paytda tanlovning shahar va tuman bosqichlari yakunlandi. Unda yoshlar estrada, raqs, musiqa, mumtoz qo‘shiq va opera ijrochiligi bo‘yicha mahoratini namoyish etdi.

Muzrabot tumanida o‘tgan tanlov yoshlik va san’at bayramiga aylanib ketdi. Unda 44 nafar yigit-qiz belgilangan yo‘nalishlarda iqtidorini sinovdan o‘tkazdi. Natijaga ko‘ra, tumandagi Obodon qishloq madaniyat uyi badiiy rahbari Sherzod Nabiyev estrada yo‘nalishida, Xalqobod qo‘rg‘onidan Ozodbek Polvonov mumtoz qo‘shiqchilik, T.Berdiyev nomidagi fermer xo‘jaliklari uyushmasidan Sojida Beknazarova raqs yo‘nalishida tanlovning viloyat bosqichiga yo‘llanma oldi.

– Mazkur tanlov olis va chekka qishloqlardagi yosh iste’dod egalarini ham kashf etib, qo‘llab-quvvatlash, ularning izlanishlarini munosib rag‘batlantirishga xizmat qilmoqda, – deydi Surxondaryo viloyati madaniyat va sport ishlari boshqarmasi boshlig‘i o‘rinbosari Muyassar Qoraqulova. – O‘tgan yili tanlovning shahar va tuman bosqichlarida 400 ga yaqin, viloyat bosqichida qirqdan ortiq yigit-qiz ishtirok etgan edi. Bu yil saralash bosqichida 700 ga yaqin iqtidorli yoshlar qatnashib, ularning oltmishga yaqini viloyat bosqichida qatnashish huquqini qo‘lga kiritdi. Ishtirokchilar safining yildan-yilga kengayib borayotgani yoshlar o‘rtasida tanlov nufuzi ortib borayotganidan dalolatdir.
O‘zA, X.Mamatrayimov

18 may – Xalqaro muzeylar kuni

Dilnoz — Sun, 17 May 2009 18:09:22 GMT

Muzeylar har bir xalq tarixi, madaniyati, turmush tarzi, milliy an’ana va qadriyatlarini o’rganish, ularni targ’ib etish va kelgusi avlodlarga yetkazishda muhim ahamiyat kasb etadi.

Prezidentimiz Islom Karimovning “Yuksak ma’naviyat – yengilmas kuch” asarida ta’kidlanganidek, har qaysi xalq yoki millatning ma’naviyatini uning tarixi, o’ziga xos urf-odat va an’analari, hayotiy qadriyatlaridan ayri holda tasavvur etib bo’lmaydi. Bu borada, tabiiyki, ma’naviy meros, madaniy boyliklar, ko’hna tarixiy yodgorliklar eng muhim omillardan biri bo’lib xizmat qiladi.

Yurtboshimiz tashabbusi bilan buyuk ajdodlarimizning boy ma’naviy merosini asrab-avaylash, yosh avlodni ularning munosib vorislari etib tarbiyalash, aholi o’rtasida olib borilayotgan ma’naviy-ma’rifiy ishlar samaradorligini oshirish borasida keng qamrovli ishlar qilinmoqda. Xususan, muzeylar faoliyatini takomillashtirish, ularni haqiqiy ma’noda xalqimiz ma’naviyatini yorqin aks ettiruvchi ma’rifat maskanlariga aylantirish borasida amalga oshirilayotgan ishlar e’tiborga molikdir.

Prezidentimizning 1998 yil 12 yanvarda qabul qilingan “Muzeylar faoliyatini tubdan yaxshilash va takomillashtirish to’g‘risida“gi farmoni bu borada dasturilamal bo’lib xizmat qilmoqda. 2008 yilda O’zbekiston Respublikasining «Muzeylar to’g‘risida»gi qonuni qabul qilinishi soha rivojida yana bir muhim qadam bo’ldi.

Bugungi kunda mamlakatimizda turli yo’nalishda 1200 dan ortiq muzey faoliyat ko’rsatmoqda. Istiqlol yillarida bunyod etilgan Temuriylar tarixi davlat muzeyi, “Qatag’on qurbonlari xotirasi” muzeyi, Termiz Arxeologiya muzeyi singari dargohlar xalqimizning ulkan bunyodkorlik va ma’naviy salohiyatini namoyon etib turibdi.

«Afrosiyob» muzeyi 2750 yildan ziyodroq tarixga ega Samarqand shahrining boy o’tmishi, madaniyatidan hikoya qiladi. Mazkur muzeyda asosan qadimiy Afrosiyob tepaliklarida olib borilgan arxeologik qazishmalar chog’ida topilgan noyob ashyolar saqlanmoqda.

– Muzey binosining birinchi qavatida eramizdan avvalgi VIII asrdan milodiy VIII asrgacha bo’lgan davrga tegishli sopol buyumlar, tosh qurollar, mis tangalar, shaharsozlik namunalari va boshqa arxeologik ashyolar davrlarga bo’lingan holda joylashtirilgan, – deydi mazkur muzey direktori Samariddin Mustafoqulov. – Ular orasida Samarqand shahrining 2750 yillik yoshini aniqlashda muhim o’rin tutgan, zaminimizdagi qadimiy shaharsozlikdan guvohlik beruvchi g’ishtlar, eramizdan avvalgi VIII-VII asrlarga tegishli xum va har xil suratlar solingan sopol bo’laklari, ayniqsa, katta ilmiy qimmatga ega.

Shuningdek, ilk temir davriga oid sopol idish parchalari, Sartepa xarobalaridan topilgan xumdon maketi, metall ishlab chiqarishda keng qo’llanilgan tosh qurollar va qoliplar, qora granitdan yasalgan o’g‘ir, mis tangalar, poyustun, otashparastlar mehrobi, tegirmon va tarozi toshlari, so’g‘d va sosoniylar tangalari, Buyuk ipak yo’lining xaritasi va boshqa eksponatlar ham shahar tarixiga oid noyob manbalar hisoblanadi.

Muzeyning eng nodir eksponatlari orasida So’g‘d hukmdori Varxuman saroyidan topilgan devor suratlarining alohida o’rni bor. 1965 yilda topilgan ushbu devoriy suratlar muzey zaliga ko’chirilib, 1985 yildan buyon namoyish etilmoqda. Ularda hukmdorning Chag’oniyon, Shosh, Xitoy va Choson (Koreya)dan kelgan elchilarni qabul qilish marosimi, to’y tantanalari, ov manzaralari aks etgan. Bu xalqimiz madaniyati va davlatchiligi tarixi, yurtimiz hududida yo’lga qo’yilgan xalqaro munosabatlar nechog’li qadimiyligidan dalolat beradi.

Samarqand shahrining 2750 yilligi arafasida muzey qayta ta’mirlanib, yangicha qiyofa kasb etdi. Ayni paytda muzey fondida 20 mingdan ziyod eksponat mavjud bo’lib, ularning 2 mingdan ortig’i ekspozitsiya zallaridan o’rin olgan.

Bugungi kunda Qoraqalpog’iston Respublikasida ham ana shunday ulkan ma’naviyat maskanlari faoliyatini takomillashtirish, ularni noyob eksponatlar bilan boyitish borasida keng qamrovli ishlar qilinmoqda. Ayni paytda Orolbo’yida ikkita davlat muzeyi, bitta uy-muzeyi va 10 ga yaqin jamoatchilik muzeylari faoliyat ko’rsatmoqda.

Nukus shahridagi Qoraqalpog’iston Davlat o’lkashunoslik muzeyida ham keyingi yillarda eksponatlar soni ko’payib, uning faoliyat doirasi kengayib bormoqda. Ushbu dargoh Orolbo’yi xalqlarining tarixi, hayot tarzi, an’ana va urf-odatlaridan guvohlik beruvchi 60 mingga yaqin osori-atiqalar, tarixiy ashyolar, tarixiy hujjatlar, qo’lyozmalar, madaniyatimiz durdonalarini o’z ichiga olgan.

Muzeyda turli mavzularda va muhim tarixiy sanalarga bag’ishlab ko’rgazmalar tashkil etish, xotira kechalari o’tkazish yaxshi an’anaga aylangan. Muzey xodimlari tomonidan o’quvchilar, talaba-yoshlar orasida o’lkamiz tarixi, madaniy boyliklari, turfa tabiati haqida keng targ’ibot ishlari, xususan, “Qushlar kuni”, “Tarixiy yodgorliklarni asraylik”, “Orol muammolari” deb nomlangan seminar mashg’ulotlari muntazam o’tkazib turiladi.

O’zbekiston Fanlar akademiyasi Qoraqalpog’iston bo’limi bilan hamkorlikda oyda bir marta oliy o’quv yurtlari talabalarining muzeyda darslarini o’tkazish yo’lga qo’yildi. Maktab o’quvchilari uchun muzey qoshida “Yosh o’lkashunoslar” to’garagi faoliyat olib bormoqda.

– Yurtboshimizning xalqimiz ma’naviyatini yuksaltirishga qaratayotgan ulkan e’tibori muzeylarimiz faoliyatini jonlantirishda ham muhim o’rin tutmoqda, – deydi muzey direktori Svetlana Nurabullayeva. – Mamlakatimiz miqyosida o’tkazilayotgan turli tanlovlar va xalqaro festivallarda faol ishtirok etyapmiz. Muzeyimiz 2006 yilda Qarshi shahrida bo’lib o’tgan xalqaro muzeylar festivalida birinchi darajali diplom bilan taqdirlangan bo’lsa, 2007 yili Marg’ilon shahrining 2000 yilligi munosabati bilan o’tkazilgan xalqaro muzeylar festivalida “Eng yaxshi saqlangan eksponatlar” nominatsiyasi bo’yicha mukofotni qo’lga kiritdi.

Vatanimiz tarixi, xalqimizning bebaho madaniy merosi haqida hikoya qiluvchi bunday ziyo maskanlarini chekka-chekka qishloqlarda ham uchratish mumkin. Namangan viloyati Namangan tumanidagi Sho’rqo’rg’on qishlog’ida faoliyat ko’rsatayotgan “Istiqlol” muzeyi bunga misol bo’la oladi.

2000 yilda tashkil etilgan ushbu muzey o’tgan yillar mobaynida turli noyob eksponatlar bilan boyib, kengayib bordi. Muzeyning “Qadriyatlarimiz qalbimizda”, “Xalq amaliy san’ati”, “Qadimgi uy-ro’zg’or buyumlari”, “Misgarlik san’ati”, “Sopol ko’zagarligi”, “Kasanachilik”, “Tasviriy oyina”, “O’zbekona uy”, “O’zbek milliy liboslari” kabi bo’limlaridan besh mingdan ziyod noyob hujjatlar, yodgorliklar, tarixiy buyumlar, qimmatli qo’lyozmalar joy olgan.

Muzeyda O’rxun yozuvidagi turkiy bitiklar tushirilgan qadimiy mis patnis, o’rta asrlarga oid kulolchilik namunalari, xalqimizning madaniy, ijtimoiy-iqtisodiy, maishiy hayoti, hunarmandchiligi, milliy urf-odatlari haqida ma’lumot beruvchi buyumlar, milliy liboslar saqlanmoqda.
O'zA

Jahonni larzaga solgan virus

Dilnoz — Sat, 09 May 2009 13:26:32 GMT

Dunyoning turli mintaqalarida AN1N1 grippi tarqalgani bois O‘zbekistonda hududimizga yangi infeksiyaning turli yo‘llar, jumladan, mamlakatimiz “havo darvozasi” orqali kirib kelishiga yo‘l qo‘ymaslik uchun barcha choralar ko‘rilmoqda. O‘zbekiston Respublikasi Sog‘liqni saqlash vazirligi Davlat sanitariya-epidemiologiya nazorati markazining “O‘zbekiston havo yo‘llari” milliy aviakompaniyasi bo‘yicha bosh shifokori Mirsaid Alimov O‘zA muxbiriga bu borada amalga oshirilayotgan ishlar xususida so‘zlab berdi.

– Hozirgi sharoitda har qanday yuqumli kasallik, avvalo, aviatransport orqali juda tez tarqalishi amaliyotdan yaxshi ma’lum, – deydi M.Alimov. – Shu bois Sog‘liqni saqlash vazirligi tomonidan “O‘zbekiston havo yo‘llari” milliy aviakompaniyasi bilan hamkorlikda yangi gripp pandemiyasi boshlangani to‘g‘risidagi dastlabki ma’lumotlar tarqalishi bilan mamlakatimizning barcha aeroportlarida, birinchi navbatda, boshqa davlatlardan samolyotlar kelib qo‘nadigan Toshkent, Nukus, Urganch, Navoiy, Samarqand, Qarshi, Termiz, Andijon, Farg‘ona, Namangan va Buxoro shaharlari aeroportlarida sanitariya-nazorat hamda tibbiy punktlar ishlari kuchaytirildi. Barcha punktlar kasallikni yuqtirganlikda gumon qilinayotgan shaxslarni tezkor aniqlash va dezinfeksiya tadbirlarini o‘tkazish uchun zarur qo‘shimcha apparatura hamda vositalar bilan ta’minlandi. Aeroportlarda epedimiologlar, yuqumli kasalliklar shifokorlari, klinitsistlar, o‘rta tibbiyot xodimlari va dezinfeksiya bo‘yicha instruktorlardan iborat mutaxassislar guruhining kecha-kunduz navbatchiligi tashkil etildi.

Havo kemalari O‘zbekiston Respublikasi hududiga qo‘nishi bilan, uning bortiga birinchi bo‘lib tibbiyot xodimlari chiqadi va ekipaj a’zolaridan yo‘lovchilar sog‘ligi haqida so‘raydi. Samolyot trapi tagiga tegishli preparatlar shimdirilgan maxsus dezinfeksiya gilamchasi to‘shaladi, shuningdek, trap zinalariga ham dezinfeksiyalovchi vositalar sepiladi. Shundan so‘nggina yo‘lovchilar va ekipaj a’zolariga samolyot bortidan tushishga ruxsat etiladi. Yo‘lovchilarni qabul qilish zalida sanitariya-nazorat punkti joylashgan bo‘lib, bu yerda ular sinchkovlik bilan tekshiruv va so‘rovdan o‘tkaziladi, elektron termometrlar yordamida ularning tana harorati o‘lchanadi. O‘tkir respirator kasalligini yuqtirganlikda gumon qilingan kishida kasallik, jumladan, gripp alomatlari aniqlangan taqdirda, u zudlik bilan sanitariya-nazorat punkti izolatoriga joylashtiriladi. Tezkor chaqiruv bo‘yicha yetib keladigan yetakchi mutaxassislar – epidemiolog va virusologlardan iborat maslahat guruhi tashxisni aniqlaydi. Agarda tashxis tasdiqlansa, bemor oldindan bunday kasallarni qabul qilish uchun joy hozirlab qo‘yilgan yuqumli kasalliklar shifoxonalaridan biriga yuboriladi.

Ta’kidlash kerakki, aprel oyi oxiridan buyon Toshkent aeroportiga dunyoning turli mamlakatlaridan 170 dan ortiq samolyot va 20 ming nafardan ziyod yo‘lovchi va ekipaj a’zolari keldi. Ularning barchasi ana shunday sanitariya tekshiruvidan o‘tkazildi va AN1N1 grippiga chalingan birorta ham kishi qayd etilgani yo‘q.

Qisqacha aytganda, bugungi kunda mamlakatimizda birorta ham yangi gripp bilan kasallanish holati ro‘yxatga olingani yo‘q. Bu O‘zbekistonda ushbu infeksiyaga qarshi amalga oshirilayotgan profilatik tadbirlarning samaradorligidan dalolat beradi. Bu boradagi ishlar kompleks ravishda, Sog‘liqni saqlash vazirligining umumiy rejasiga binoan amalga oshirilmoqda. Bu jarayonga nafaqat davlat sanitariya-epidemiologiya nazorati xizmati, balki respublikamizning davolash-profilaktika muassasalari ham jalb etilgan. Ular mamlakatimizdagi epidemiologik vaziyat osoyishta saqlanishi, turli yuqumli kasalliklar, jumladan, yangi gripp kirib kelishi va tarqalishiga yo‘l qo‘ymaslik uchun, barcha mavjud vositalardan foydalangan holda, zarur chora-tadbirlarni amalga oshirmoqdalar.
O‘zA, A.Ivanova

O`zbekiston + Koreya = do`stlik

Erpolat — Thu, 07 May 2009 16:46:44 GMT

O‘zbekiston dunyoning ko‘plab mamlakatlari bilan hamkorlik qiladi. Lekin mamlakatimizning xalqaro munosabatlarida Koreya Respublikasi alohida o‘rin tutadi. Xalqlarimizni qadimda savdo aloqalari va madaniy almashuv yaqinlashtirgan bo‘lsa, bugun siyosiy va iqtisodiy manfaatlar mushtarakligi, davlat rahbarlarining hamfikrlik va hamjihatligi mamlakatlarimizni yaqin do‘st va ishonchli sheriklarga aylantirdi.

Tong bokiraligi o‘lkasi O‘zbekiston mustaqilligini birinchilar qatorida tan olganini, yurtimizda boshlangan iqtisodiy islohotlarni keng miqyosda qo‘llab-quvvatlab kelayotganini ta’kidlash joiz. Koreya Respublikasi O‘zbekiston Respublikasining eng yirik sarmoyaviy sheriklaridan. Uning mamlakatimiz iqtisodiyotiga kiritgan sarmoyasi hajmi 2 milliard AQSH dollaridan oshadi. O‘zbekiston Janubiy Koreya bilan hamkorlikda ishlab chiqarishning o‘ta murakkab, eng ilg‘or texnologiyalar talab qiladigan, tayyor mahsuloti yuksak darajadagi qo‘shimcha qiymatga ega bo‘lgan turini o‘zlashtirib, dunyodagi sanoqli avtomobilsoz davlatlar qatoridan o‘rin oldi.

Umuman, ikki tomonlama iqtisodiy hamkorlik haqida so‘z yuritganda, bu aloqalar zamon ruhi va davr talablariga mos yo‘nalishda rivojlanayotganini qayd etish joiz. O‘zbekiston paxtachilikda katta imkoniyatlarga ega. Janubiy Koreya to‘qimachilik texnologiyalari sohasida ko‘p yutuqlarni qo‘lga kiritgan. Bu ikki omil hisobga olinib, yurtimizda to‘qimachilik mahsulotlari ishlab chiqaradigan qo‘shma korxonalar tuzildi.

Yana bir yo‘nalish – yuqori texnologiyalar. O‘zbekiston va Koreya bu yo‘nalishda ham o‘zaro hamkorlikni izchil rivojlantirmoqda.

Navoiy shahridagi xalqaro aeroport negizida barpo etilayotgan qit’alararo intermodal logistika markazi – O‘zbekiston uchun, avtomobilsozlik kabi, mutlaqo yangi sohani o‘zlashtirish imkonini beradi. MDHda yagona bo‘lgan bu markazda yuklar tezkorlik bilan tushiriladi va ortiladi, taqsimlanadi, maxsus omborlarga joylashtiriladi. Yaqin kelajakda Navoiydagi erkin industrial-iqtisodiy zona global yuk tashish tarmog‘ining muhim bo‘g‘iniga aylanadi.

Shu bilan birga, mamlakatlarimiz elektronika mahsulotlari ishlab chiqarish, neft-gaz sanoati va konchilik sohalarida ham yaqindan hamkorlik qilyaptiki, bu yo‘nalishlarning serdaromadligi, dolzarbligi va ahamiyatini alohida ta’kidlamoq joiz.

Koreya Respublikasi siyosiy sohada ham O‘zbekistonning ishonchli sheriklaridan. Xususan, rasmiy Seul O‘zbekiston Respublikasini Osiyoda hamkorlik bo‘yicha muloqotga (ACD) a’zo bo‘lishda yoqladi. Mintaqalararo hamkorlikning yangi mexanizmlarini o‘zida mujassam etgan bu tuzilma ASEAN davlatlari bilan Fors ko‘rfazi, Sharqiy va Janubi-Sharqiy Osiyo mamlakatlari, shuningdek, Avstraliya, Yangi Zelandiya o‘rtasida aloqalarni mustahkamlashga xizmat qiladi.

E’tiborli yana bir jihat, 2005 yil 10 may kuni Koreya Respublikasining o‘sha vaqtdagi Prezidenti No Mu Xyon davlat tashrifi bilan O‘zbekistonga kelgan edi. Joriy yil 10 may kuni ushbu mamlakatning yangi Prezidenti Li Myon Bakning O‘zbekistonga davlat tashrifi boshlanadi. Ya’ni, ikki tashrif ham yurtimizda Xotira va qadrlash kuni nishonlanayotgan kezlarga to‘g‘ri kelmoqda. Bunda o‘ziga xos ramziy ma’no bor. Zero, Janubiy Koreya ahli o‘tgan asrning suronli yillarida majburan ko‘chirilgan minglab koreyslar O‘zbekistondan panoh topganini, bag‘rikeng o‘zbek xalqining og‘ir damlardagi saxovatini aslo unutmaydi. Bugun koreys millatiga mansub minglab o‘zbekistonliklar barcha yurtdoshlarimiz qatori mamlakatimiz ravnaqi yo‘lida faol mehnat qilmoqda. O‘zbekistonni o‘zining Vatani deb biladi. Bu ham siyosiy, ham iqtisodiy, ham gumanitar aloqalarni rivojlantirishda muhim ahamiyatga ega bo‘lgan omildir. Xalqlarimizning ma’naviy yaqinligi, birdamligi, sharqona tafakkuri o‘zaro ishonchni mustahkamlashga, hurmatni oshirishga, barcha sohalarda hamkorlikni kengaytirishga xizmat qilmoqda.

…Mamlakatlarimiz o‘rtasida qaror topgan oliy darajadagi do‘stlik alohida ahamiyatga ega. Prezident Islom Karimov 2008 yilning fevral oyida Seulga tashrif buyurib, Koreya Respublikasining yangi saylangan Prezidenti Li Myon Bakning inauguratsiya marosimida ishtirok etdi. O‘zbekiston-Koreya munosabatlarida hali kuzatilmagan bu voqea Koreya rahbariyati va xalqining O‘zbekistonga yuksak hurmati belgisi bo‘ldi. Ayni paytda bu voqea Li Myon Bak O‘zbekiston rahbariyati tomonidan samimiy qutlanganini ham anglatadi.

2008 yilning avgust oyida XXIX Olimpiya o‘yinlarining tantanali ochilish marosimida qatnashgan Islom Karimov va Li Myon Bak Pekinda muzokara o‘tkazdilar. Aslida bu shaxsiy do‘stlik munosabatlari ancha avval boshlangan. 2006 yil mart oyida Prezident Islom Karimovning Koreya Respublikasiga davlat tashrifi asnosida o‘sha kezlari Seul meri lavozimida ishlagan Li Myon Bak O‘zbekiston rahbariga ikki mamlakat xalqlarining do‘stligini mustahkamlashga qo‘shgan ulkan hissasi uchun “Seulning faxriy fuqarosi” unvonini topshirgan edi.

Koreya Respublikasi Prezidenti Li Myon Bakning O‘zbekistonga davlat tashrifi mamlakatlarimiz o‘rtasida qaror topgan o‘zaro hamkorlikning yanada mustahkamlanishiga xizmat qiladi.

Jahon suv kengashi delegatsiyasi O‘zbekistonda

Erpolat — Thu, 07 May 2009 16:23:11 GMT

Mamlakatimizga tashrif buyurgan Jahon suv kengashi prezidenti Luis Fashon rahbarligidagi delegatsiya 7 may kuni O‘zbekiston Respublikasi Qishloq va suv xo‘jaligi vazirligida muzokara o‘tkazdi.

Muloqot chog‘ida O‘zbekistonda Prezident Islom Karimov rahnamoligida boshqa jabhalar singari qishloq va suv xo‘jaligi sohasida amalga oshirilayotgan izchil islohotlar yuksak samaralar berayotgani, bu xorijiy hamkorlar bilan o‘zaro aloqalarni rivojlantirishda muhim ahamiyat kasb etayotgani alohida ta’kidlandi.

Bugungi kunda ko‘plab mamlakatlarda suv tanqisligi dolzarb muammoga aylangan. Suv resurslari boshqaruvini takomillashtirish va ulardan unumli foydalanish nafaqat qishloq xo‘jaligini barqaror rivojlantirish va oziq-ovqat xavfsizligini ta’minlash, ayni paytda inson salomatligini yaxshilash, atrof-muhitni muhofaza qilish, ekologik muvozanatni saqlash imkonini beradi.

Muzokarada mamlakatimiz bilan Jahon suv kengashi o‘rtasida qishloq va suv xo‘jaligi sohasidagi o‘zaro manfaatli aloqalarning bugungi ahvoli va istiqboli, suv resurslaridan unumli foydalanish va suvni tejaydigan texnologiyalarni joriy etish, xalqaro miqyosda tajriba almashishni faollashtirish va hamkorlikni kengaytirish yuzasidan fikr almashildi.
UzA.uz

O'zbekistonda cho'chqa grippiga qarshi ehtiyot choralari

Dilnoz — Mon, 04 May 2009 16:27:29 GMT

O'zbekiston Sog`liqni saqlash vazirligi ma’lumotiga ko`ra, mamlakatda cho`chqa grippi qayd etilmagan. Kasallikning oldini olish uchun maxsus chora-tadbirlar ko’rilmoqda.

Chegara, aeroport va temir yo`l vokzallarida sanitariya-epidemiya nazorati kuchaytirilgan.

O’zbekiston Sog’liqni saqlash vazirligi sanitariya-epidemiologiya nazorati boshqarmasi boshlig’i o’rinbosari Boqijon Matkarimov so’zlariga ko’ra, respublika epidemiyaga qarshi kurash favqulodda komissiyasi cho’chqa grippining oldini olish tadbirlari yuzasidan yig’ilish o`tkazgan.

“Yig’ilishda tegishli vazirliklarga nimalar qilish kerakligi belgilab berildi. Respublika miqyosida doimiy ishlaydigan shtab tashkil etildi. Shtab monitoring olib boradi, vaziyat bo’yicha har kuni ikki marta Vazirlar Mahkamasiga axborot beradi. Bundan tashqari, Toshkent xalqaro aeroportiga sanitariya nazoratini kuchaytirish uchun qo’shimcha tibbiy xodimlar biriktirildi. Ular xorijdan kelayotgan fuqarolar haroratini o’lchamoqda. Davlat chegarasida sanitariya nazorati ham kuchaytirilgan. Shifoxonalarda gripp yuqtirganlikda gumon qilingan kishilar uchun 20 tadan o’rinlar ajratildi. Hozircha O’zbekistonda bu gripp turi qayd etilmagan”, - deydi Boqijon Matkarimov.

Uning aytishicha, cho’chqa grippi asoratlari oddiysidan kam farq qiladi, faqat bu kasalikka qarshi vaksina yaratilmagan, cho’chqa grippi bilan og’rishda o’lim holati nisbatan ko’proq qayd etilgan.

“Qo`shni davlatlardagi vaziyat ham doimiy tahlil qilib borilmoqda. Kasallik kirib kelmasligi uchun barcha imkoniyatlar ishga qolayapmiz. Jahon Sog`liqni saqlash tashkiloti tavsiyasiga ko`ra, bu Gripp-A, H1-N1 deb nomlanayapti. Bunda ham tana harorati ko`tarilishi, aksa urish, tomoq og`rishi kabi belgilar bilan kuzatiladi, faqat asorati og’irroq”, - deydi Matkarimov.

Hozircha MDH miqyosida cho`chqa grippi aniqlangani haqida ma`lumot yo`q.

Jahon Sog’liqni saqlash tashkiloti yaqinda epidemiyaning tahdid darajasini yana bir pog`onaga ko`targan. Tashkilot dunyo davlatlarini ehtiyot choralarini kuchaytirishga chaqirmoqda.
Cho`chqa grippi cho`chqa go`shtidan yuqishi mumkinligi haqidagi taxminlar muhokamada. Ayrim davlatlarda cho`chqa go`shti sotuvdan olinmoqda.

Mintaqa davlatlaridan Tojikiston birinchilardan bo`lib cho`chqa go`shti importini taqiqladi. O`zbekiston mahsulot hamon sotuvda.

Boqijon Matkarimov fikricha, gripp go`shtdan yuqishi haqidagi talqinlar asossiz.

“Gripp go`shtdan yuqishi qiyin, virus yuqishi uchun tirik to`qima bo`lishi kerak. Har bir davlat bu borada o`zi mustaqil ravishda qaror qabul qiladi”, - deydi u.

Respublika epidemiyaga qarshi kurash komissiyasiga ko`ra, sog`liqni saqlash tizimi epidemiyaga qarshi turishga tayyor, kasallikda gumon qilingan kishilarni izolyatsiya qilish uchun maxsus o’rinlar ajratib qo`yilgan.

Cho'chqa grippi tarqalarkan, asosiy talab - ogohlik

Dilnoz — Mon, 04 May 2009 16:17:57 GMT

Meksikada cho'chqa grippidan 103 kishi o'lgan. 1600 odam kasallik bilan olishmoqda.
Shimoliy Amerika cho’chqa grippi tarqalishiga qarshi keskin choralar ko’ra boshlagan.

Qo’shma Shtatlarda prezident Barak Obama xalqni vahimaga tushmaslikka,ammo ogoh bo’lishga undamoqda.

Jahon Sog’liqni Saqlash Tashkiloti Meksikadan chiqqan bu kasallik hozirda AQSh va Kanada, hatto Yangi Zelandiyaga yetib borgani pandemiyaga olib borishi mumkin deya xavotir bildirmoqda.

Bu tashkilot bosh direktori muovini Keyji Fukuda dunyoning har bir davlatini ehtiyotkorlikka, kasallikni nazorat qilib, grippdek tez tarqaladigan kasallikning oldini olishga chaqirmoqda.

Keyji Fukudaning tasdiqlashicha, hozirgacha Meksikada cho’chqa grippidan 103 kishi o’lgan va 1600 dan ziyod odam muolaja olmoqda.

AQSh, Kanada va Yevropada aerportlarda tekshiruv kuchaytirilgan. Amerikaning besh shtati – Texas, Kaliforniya, Nyu-York, Kanzas va Ogayoda 20 kishi bu gripp bilan olishayotgani ma’lum.

Jahon Sog’liq Saqlash Tashkiloti mutaxassislari “cho’chqa grippi odamdan odamga oddiy yo’llar orqali yuqadigan kuchli virus”, deydi. “Har safar virus o’zgarishi va murakkab tusga kirishi mumkin”,- deydi shifokorlar.

AQShda hukumat har bir shaxsni ehtiyorkorlikka chaqirmoqda.

"Ortiqcha vahimaga hojat yo’q, ammo grippga chalindim deb o’ylasangiz uyda o’tiring. Aloqani cheklang. Gigiyenaga rioya qiling. Atrofdagilarda gripp alomatlarini sezsangiz, o’zingizni saqlash haqida o’ylang",- deya bildiradi Oq Uy.

BMT qoshidagi Jahon Sog’liq Saqlash Tashkiloti bugungi tibbiy texnoligiya, dori-darmon va davolash usullari epidemiyalar xavfini cheklashga qodir deya ishonch bildirmoqda.

Innovatsion g‘oyalar xalq farovonligini yuksaltirishga xizmat qiladi

Erpolat — Wed, 29 Apr 2009 18:36:10 GMT

“O‘zekspomarkaz”da II Respublika innovatsiya g‘oyalari, texnologiyalari va loyihalari yarmarkasi davom etmoqda. Tadbirda qator vazirlik va idoralar, bank-moliya muassasalari, korxonalar, fermer xo‘jaliklari, ilmiy-tadqiqot muassasalari, xalqaro tashkilotlar vakillari ishtirok etmoqda.

Yarmarkaning navbatdagi ish kunida O‘zbekiston Respublikasi Qishloq va suv xo‘jaligi vazirligi, O‘zbekiston Qishloq xo‘jaligi ilmiy-ishlab chiqarish markazi, Fanlar akademiyasi, “O‘zkimyosanoat” davlat-aksiyadorlik kompaniyasi kabi vazirlik va idoralar, korxona va kompaniyalarning taqdimoti bo‘lib o‘tdi. Tadbirlarda Prezidentimiz Islom Karimovning 2008 yil 15 iyulda qabul qilingan “Innovatsion loyihalar va texnologiyalarni ishlab chiqarishga tatbiq etishni rag‘batlantirish borasidagi qo‘shimcha chora-tadbirlar to‘g‘risida”gi qarori mamlakatimiz ilm-fan muassasalari, sanoat korxonalari o‘rtasidagi o‘zaro aloqalarni rivojlantirishga xizmat qilayotgani alohida ta’kidlandi.

Mamlakatimizda qishloq xo‘jaligini izchil va barqaror rivojlantirish, yerlarning meliorativ holatini yaxshilash va shu tariqa hosildorlikni oshirish hamda melioratsiya ishlarini tashkil qilish va moliyalashtirish mexanizmini takomillashtirishga alohida e’tibor qaratilmoqda.

Suv resurslarini boshqarishni takomillashtirish va undan unumli foydalanish nafaqat qishloq xo‘jaligini barqaror rivojlantirish va oziq-ovqat xavfsizligini ta’minlash, ayni paytda inson salomatligini mustahkamlash, atrof muhitni muhofaza qilish, ekologik muvozanatni saqlash imkonini beradi. Toshkent irrigatsiya va melioratsiya institutining ilmiy va amaliy tadqiqotlar markazi yarmarkada qishloq xo‘jaligini rivojlantirish, tuproq unumdorligini oshirish, yerlarning meliorativ holatini yaxshilash, suv resurslaridan unumli foydalanish va suv tejash texnologiyalariga oid o‘ndan ortiq yangi g‘oya va loyihalar bilan ishtirok etmoqda. Ular orasida elektr filtr va elektr impulsli diagnostika, tomchilatib sug‘orish tizimiga oid innovatsion g‘oyalar bor. Ilgari bunday uskunalar chet eldan olib kelinar edi.

Mazkur markaz direktor Anvar Sherovning aytishicha, o‘tgan yilgi yarmarkada ushbu markaz korxonalar bilan jami yigirma to‘rt million so‘mlik sakkizta shartnoma imzolagan edi. Bu yilgi yarmarkaning birinchi kunida esa bir qator fermer xo‘jaliklari bilan umumiy qiymati o‘n ikki million so‘mlik beshta shartnoma imzolandi.

Tadbirda sanoat, qishloq xo‘jaligi, sog‘liqni saqlash, farmatsevtika, axborot-kommunikatsiya texnologiyalari, ilm-fan va ta’lim sohasida yaratilgan qariyb olti yuzdan ziyod yangi texnologiya va ishlanmalar namoyish etilayotir. Xalqaro talablarga to‘liq javob beradigan, eksportbop va import o‘rnini bosadigan mahsulotlar ishlab chiqarishga qaratilgan ushbu innovatsiyalar kelgusida mamlakatimiz iqtisodiyotini yanada rivojlantirish, xalqimiz farovonligini yuksaltirishga xizmat qiladi.
uza.uz

“O‘zbekiston xalq amaliy san’ati – dunyo nigohida”

Erpolat — Wed, 29 Apr 2009 18:23:51 GMT

Toshkentdagi Abulqosim madrasasida 29 aprel kuni “O‘zbekiston xalq amaliy san’ati – dunyo nigohida” savdo-ko‘rgazmasi ochildi.

“O‘zbekturizm” milliy kompaniyasi, O‘zbekiston Milliy san’at markazi hamda “Hunarmand” uyushmasi hamkorligida tashkil etilgan mazkur tadbirning ochilishida yurtimizdagi qator vazirlik va idoralar, mamlakatimizda akkreditatsiya qilingan diplomatik korpus vakillari ishtirok etdi.

“Hunarmand” uyushmasi raisi M.Qurbonov Prezident Islom Karimov rahnamoligida milliy an’ana va qadriyatlarimizni tiklash, o‘rganish, rivojlantirish va targ‘ib etish, boy madaniy va ma’naviy merosni asrab-avaylash va kelgusi avlodlarga yetkazish borasida amalga oshirilayotgan keng ko‘lamli islohotlar yurtimizda sayyohlik sohasining yanada takomillashtirishga xizmat qilayotganini alohida ta’kidladi.

Xalq amaliy san’ati namunalari va milliy hunarmandlik buyumlari xorijlik sayyohlar e’tiborini tortuvchi muhim omillardandir. Ko‘rgazmada hunarmandlarimiz tayyorlagan rang-barang mahsulotlar, jumladan, kulolchilik va zardo‘zlik, yog‘och o‘ymakorligi va milliy kashtachilik buyumlari namoyish etilmoqda.

Toshkentda koreys madaniyat kunlari

Dilnoz — Fri, 24 Apr 2009 19:02:29 GMT

Aytish joizki, O‘zbekiston bilan Koreya o‘rtasida san’atning barcha sohalari, jumladan, kinematografiya yo‘nalishidagi hamkorlik yil sayin kengaymoqda. Ikki mamlakat ijodkorlari O‘zbekiston va Koreyada o‘tkaziladigan kinofestivallarda muntazam ishtirok etib kelishmoqda. Poytaxtimizda 20 aprel kuni boshlangan Koreya filmlari kinofestivalida tomoshabinlar e’tiboriga koreyalik kinoustalar tomonidan so’nggi yillarda yaratilgan filmlar havola etildi.

– O‘zbekiston kino san’ati jadal rivojlanmoqda, – deydi koreyalik kinorejissor Kim Yong Sun. – Buyuk Ipak yo‘li chorrahasida joylashgan mamlakatingiz boy madaniyati va tarixi bilan dunyoga mashhur. O‘zbek kino ustalari suratga olgan qator filmlar nufuzli xalqaro kinofestivallarda sovrinli o‘rinlarga sazovor bo‘layotganidan xabardormiz. Koreya Respublikasi kinofestivali mamlakatlarimiz o‘rtasidagi madaniy hamkorlikni yanada mustahkamlashga xizmat qiladi.

Aslini olganda, o’zbek tomoshabini uchun koreys filmlari u qadar yangilik emas. Chunki, qalbimiz to’ridan joy olgan qator kinofilmlar, teleseriallar orqali koreys kinoustalari ijodi bilan bir qadar tanishmiz. Zero, jahon kinosanoatida ko’p daromad keltiruvchi filmlar yaratishga urinish an’anasi kuzatilayotgan bir paytda sof insoniy tuyg’ular, umuminsoniy qadriyatlarni tarannum etuvchi koreys filmlari ko’pchilikning mehrini qozongani aniq. Bu gal ham kinofestival davomida yurtimiz kino ishqibozlari Koreyaning o’zida ham anchagina shuhrat qozongan filmlardan bahramand bo’ldilar.

«Tayfun», «Maysalar» va «Qizlarga oson emas» deb nomlangan badiiy filmlarninig barchasida ham koreys xalqining turmush tarzi, urf-odat va an’analari, san’ati va madaniyati hamda yoshlar hayoti o’z ifodasini topgan. Filmlarni tomosha qilish maqsadida kelganlar orasida turli yoshdagi tomoshabinlarni ko`rish mumkin edi. Shundan kelib chiqib aytish mumkinki, Koreya madaniyati va dunyoga mashhur dramalariga qiziqqan har bir tomoshabin uchun ushbu kinofestivalning o`tkazilishi quvonarli hol bo’ldi.