Islom Karimovning “O‘zbekiston xalq yozuvchisi Abdulla Qahhor tavalludining 100 yilligini nishonlash to‘g‘risida”gi qarori adib hayoti va ijodini keng o‘rganish, uning asarlarida ilgari surilgan ezgulik va insonparvarlik g‘oyalarini yosh avlod tafakkuriga singdirishda dasturilamal bo‘lib xizmat qilmoqda. Shu maqsadda Respublika ma’naviyat targ‘ibot markazining Toshkent viloyat bo‘limi hamda Chirchiq shahar hokimligi birgalikda bu yerdagi maishiy xizmat ko‘rsatish kasb-hunar kollejida olimlar, o‘qituvchilar, talabalar va kitobxonlar ishtirokida “So‘z san’ati ustasi” mavzuida ilmiy-amaliy anjuman o‘tkazdi. – Abdulla Qahhor ijodiy merosi o‘zbek adabiyoti rivojida muhim o‘rin tutadi, – dedi viloyat ma’naviyat targ‘ibot markazi rahbari S.Qurbonqulov. – Adib asarlari yoshlarimizni vatanparvarlik, milliy va umuminsoniy g‘oyalarga hurmat ruhida tarbiyalashda katta ahamiyatga ega. Shu bois biz bugungi anjumanda ishtirokchilar e’tiborini Abdulla Qahhor ijodidagi ma’naviy-tarbiyaviy masalalarga qaratdik. Tadbirda so‘zga chiqqanlar buyuk yozuvchimizning hayoti va faoliyati, boy ma’naviy merosi, yuksak badiiy mahorati, bugungi kunda adib asarlarini chuqur o‘rganish va targ‘ib qilish masalalari xususida to‘xtalib o‘tdilar. Kasb-hunar kolleji talabalari ijrosida Abdulla Qahhor asarlari asosidagi sahna ko‘rinishlari namoyish etildi. UzA
|