 “Lukoyl O‘zbekiston opereyting” operatsiya kompaniyasi Xovuzak konidan dastlabki bir milliard kub metr gazni qazib oldi.
Rejalashtirilgan 23 gaz qazib oluvchi quduqning 15 tasini bosqichma-bosqich ishga tushirish qazib olish hajmini oshirish imkonini berdi. Yaqinda 16-quduq foydalanishga topshirildi, yana uchta quduqda burg‘ilash ishlari davom etmoqda.
“Lukoyl O‘zbekiston opereyting” operatsiya kompaniyasining gazni qazib olish va qayta ishlash bo‘limi rahbari Valeriy Droninning ta’kidlashicha, yuqori kasbiy tayyorgarlikka ega soha mutaxassislari faoliyati yaxshi yo‘lga qo‘yilgani Xovuzakdagi ishlar samaradorligini oshirishda muhim o‘rin tutmoqda. 2007 yilning noyabrida ushbu gaz qazib oluvchi majmua ishga tushirilgach, o‘rtacha gaz qazib olish hajmi 4 barobar oshdi va qariyb 200 million kub metrga yetdi. Konning loyiha quvvati yiliga 3 milliard kub metrni tashkil etadi. Bu ko‘rsatkichga joriy yildayoq erishish mo‘ljallanmoqda.
Xovuzakka yaqin Shodi uchastkasida esa dastlabki baholash qudug‘i o‘rnatildi. “Lukoyl O‘zbekiston opereyting”operatsiya kompaniyasi burg‘ilash ishlari buyurtmachisi, Chexiyaning Eriell servis kompaniyasi esa pudratchi hisoblanadi. Chexiya kompaniyasi Xovuzak-Shodi konida jami uchta quduqni burg‘ilamoqda.
So‘nggi yillarda Rossiyaning yirik “Lukoyl” kompaniyasi O‘zbekiston bozorida faol ish olib borayotir. Toshkentda Mahsulotni taqsimlash to‘g‘risidagi bitim shartlari asosida Qandim-Xovuzak-Shodi-Qo‘ng‘irot megaloyihasini boshqarish bo‘yicha “Lukoyl O‘zbekiston opereyting” operatsiya kompaniyasi tashkil etildi. Investitsiyalar miqdori ikki milliard AQSH dollaridan ortadi. Loyihani “Lukoyl oversiz O‘zbekiston LTD” sho‘ba kompaniyasi va “O‘zbekneftgaz” Milliy xolding kompaniyasi tarkibidagi investorlar konsorsiumi amalga oshirmoqda.
UzA
| 
