Qit’amizdagi futbol jamoalarining eng nufuzli musobaqasi – Osiyo chempionlar ligasining “D” guruhidagi so‘nggi uchrashuvni o‘z maydonida o‘tkazgan Toshkentning “Paxtakor” jamoasi “Al-Garafa” (Katar) futbolchilarini 2:0 hisobida mag‘lubiyatga uchratdi.
Bellashuvda hujumkor o‘yin ko‘rsatgan toshkentliklar o‘n to‘qqqizinchi daqiqada hisobni ochdi. Mohir hujumchi Zayniddin Tojiyev jamoadoshi uzatgan to‘pni boshi bilan darvoza to‘riga joyladi.
Uchrashuvning ikkinchi yarmida paxtakorchilarning ko‘psonli hujumlaridan birini qaytarishga uringan arab futbolchilari o‘z jarima maydonchasida o‘yin qoidasini buzdi. Hakam tomonidan belgilangan penaltini Odil Ahmedov aniq bajarib, hamyurtlarimizning g‘alabasini ta’minladi.
Nufuzli musobaqadagi ikkinchi vakilimiz – “Quruvchi” (Toshkent) futbolchilari chorak final masalasini muddatidan oldin hal qilgan bo‘lsa-da, “A” guruhidagi oltinchi tur uchrashuvini Eronda “Sepaxon”ga qarshi o‘tkazdi.
Mirjalol Qosimov shogirdlari uchun bellashuv omadsiz boshlandi. Ikkinchi daqiqada Jaloliddin Ali Muhammadiy darvozabonimiz Murod Zuhurov darvozasini ishg‘ol qilib, hisobni ochdi.
Butun uchrashuv davomida hujumga zo‘r bergan o‘zbekistonlik charm to‘p ustalari ikkinchi bo‘limning o‘rtalarida vaziyatni tenglashtirdi. Hujumchilarga yordamga kelgan markaziy himoyachi Gochkuli Gochkuliyev raqib posbonini ojiz qoldirib, “Quruvchi”ga bir ochko keltirdi – 1:1.
UzA
|