Toshkent viloyatida xotin-qizlar o‘rtasida davom etayotgan futbol bo‘yicha O‘zbekiston XII milliy chempionatining birinchi tur bellashuvlari yakunlandi. Sakkiz jamoa uchtadan uchrashuv o‘tkazdi.
Andijonning “Andijanka” jamoasi vakillari “Sherdor”ni (Samarqand) 11:0, “Sevinch-2”ni (Qarshi) 5:0, “Gulbahor”ni (Namangan) 14:0 hisobida mag‘lubiyatga uchratib, to‘plar nisbati bo‘yicha, musobaqa jadvalida birinchi o‘ringa ko‘tarilib oldi.
Mamlakatimizning amaldagi chempioni – “Sevinch” (Qarshi) futbolchi qizlari esa “Sherdor”ni 16:0, “Stroitel”ni (Zarafshon) 1:0 hisobida yengdi.
Buxoro viloyati sharafini himoya qilayotgan “Yoshlik” jamoasi ham bu yildan e’tiboran sovrinli o‘rinlar uchun kurashadiganlar qatoriga qo‘shildi. Buxoroliklar birinchi tur uchrashuvlarida “Sevinch-2”dan 2:1, “Gulbahor”dan 3:0, “TerDU-Surxon”dan 2:1 hisobida ustun keldi.
Qolgan uchrashuvlarda quyidagi natijalar qayd etildi: “Stroitel” – “Gulbahor” 9:0, “Sevinch-2” (Qarshi) – “Sherdor” (Samarqand) 2:0, “TerDU-Surxon” – “Stroitel” 1:5.
To‘purarlar bahsida raqiblar darvozasini o‘n ikki marotaba ishg‘ol qilgan “Andijanka” hujumchisi Nargiza Abdurasulova yetakchilik qilmoqda.
Chempionatning ikkinchi tur uchrashuvlari 24–26 iyun kunlari Toshkent viloyatida o‘tkaziladi.
UzA
|