Xalqimizga xos mehr-oqibat, mehr-muhabbat, mehr-shafqat, qadr-qimmat degan, bir-birini chuqur ma’no-mazmun bilan boyitadigan iboralar borki, bu fazilatlar asrlar mobaynida el-yurtimizning dunyoqarashi, ma’naviy hayotining negizi sifatida vujudga kelgan, ongu shuurimizdan chuqur joy olgan buyuk qadriyatlarning amaliy ifodasidir.

Birgina mehr-oqibat tushunchasining o’ziyoq insonning inson bilan, oilaning oila bilan, qo’shnining qo’shni bilan ahil-inoq bo’lib, tinch-totuv yashashi, bir-biriga sidqidildan, beg’araz yordam berishi kabi yuksak ma’naviy qadriyatlarni anglatadi. “Qo’shning tinch – sen tinch”, “Do’st kulfatda sinalar” kabi naqllar aslida ham ana shu insoniy xususiyatlar xalqimizning ma’naviy olamiga chuqur singib ketganidan dalolatdir.

Davlatlar va xalqlar o’rtasidagi munosabatlar ham aynan shu kabi ma’naviy asoslarga – o’zaro hurmat-ehtirom, ishonch va mehr-oqibatga tayanganda yanada samarali hamda istiqbollidir. O’zbekiston bilan Xitoy o’rtasidagi o’zaro manfaatli hamkorlikka asoslangan aloqalar bunga yaqqol misol bo’la oladi.

Mamlakatlarimizning o’zaro hamkorligida ikki davlat rahbarlari o’rtasida qaror topgan ishonch va hurmat-e’tibor muhim ahamiyat kasb etadi. Yurtboshimiz ta’biri bilan aytganda, O’zbekiston Xitoy bilan munosabatlarning bugungi holatini, aloqalarning hozirgi sur’atini yuksak qadrlaydi. 2005 yili mamlakatlarimiz o’rtasida Do’stlik, hamkorlik va sheriklik munosabatlari to’g‘risidagi davlatlararo shartnoma imzolangan.

Mamlakatlarimiz o’rtasida izchil rivojlanib borayotgan siyosiy-iqtisodiy hamkorlik nafaqat O’zbekiston-Xitoy aloqalari, balki mintaqaviy va xalqaro miqyosdagi ko’p tomonlama munosabatlarda ham muhim o’rin tutmoqda.

Xitoy O’zbekistonning muhim hamkorlaridan hisoblanadi. Bugungi kunda mamlakatlarimiz o’rtasida savdo-iqtisodiy, ilmiy-texnikaviy, madaniy va boshqa ko’plab sohalarda samarali hamkorlik keng yo’lga qo’yilgan. Yurtimizda Xitoy investitsiyasi ishtirokida 136 korxona faoliyat yuritmoqda. O’tgan yili ikki mamlakat o’rtasida o’zaro tovar aylanmasi hajmi 749 million AQSh dollarini tashkil qildi.

Ma’lumki, shu yil 12 may kuni Xitoyning Sichuan provinsiyasida ro’y bergan kuchli zilzila oqibatida 50 mingdan ortiq kishi halok bo’lgan, 30 mingga yaqin kishi bedarak yo’qolgan. Yuz minglab kishilar jarohat olgan.

Do’sti va hamkori boshiga og’ir musibat tushganda befarq bo’lib turish xalqimizning tabiatiga mutlaqo yotdir. Aynan shu bois Prezidentimiz Islom Karimov tashabbusi bilan Xitoy Xalq Respublikasining zilziladan talafot ko’rgan aholisiga insonparvarlik yordami ko’rsatildi.

O’zbekistonning 50 tonnaga yaqin beg’araz ko’magining dastlabki 25 tonnasi – palatkalar, ko’rpa-to’shaklar, oziq-ovqat va boshqa zarur ashyolar 22 may kuni Urumchi shahri aeroportiga keltirildi.

Urumchi shahrida O’zbekistonning insonparvarlik yordamini Xitoy Xalq Respublikasining rasmiy vakillariga topshirish marosimi bo’ldi.

Tadbirda ta’kidlanganidek, xalqlarimizni azaldan do’stlik va hamkorlik rishtalari bog’lab turadi. Mamlakatimizning XXRga ko’rsatgan ushbu insonparvarlik yordami tabiiy ofatdan jabr ko’rgan do’st xalq qayg’usiga sherikligimizning amaliy ifodasidir.